Ein spade.
Refleks i Hordaland Folkeblad 14.06.2013
Som stortingspolitikar må ein rekne
med å verte sjikanert i offentlegheita dagleg. Såpass må ein tåle
når ein trur ein kan styre landet vårt. På same måte som med
kongelege og andre kjendisar kan alt frå meiningar, feilsitat,
hårfrisyre og tabbar på byen verte til god underhaldning for resten
av folket. Media lever godt av desse «feilstega» og me kan alle le
i kor av dei, såpass må dei tåle når dei legg seg sjølv ut i
rampelyset og trur dei er noko. Noko meir enn oss andre. Det same
gjeld tydelegvis ambisiøse tenåringar som har mot nok til å melde
seg på Idol og liknande. Me spelar dei dummaste scenane omatt og
omatt, til spott og spe, artig for ungan. Dei skulle aldri ha meldt
seg på om dei ikkje kunne tåla kritikken, nettdebattane, presset,
pressa.
Så har me heradsstyrepolitikarane då.
Snakk om å tru ein er noko. Tenka seg til, tru at ein kan styra ein
kommune! Nei, dei fortener eigentleg all den driten dei kan få.
Dersom me kan vri på det dei seier og misforstå litt med vilje, så
har dei bedd om det sjølv. Det er ikkje mobbing, det er politisk
debatt. Det er viktig at me får slike debattar i avisa og rundt
middagsborda, og at nokon kallar ein spade for ein spade, ein tosk
for ein tosk. Det er noko alle og ein kvar forstår.
Men ein ting må me gå saman og få
slutt på. Det er altfor mykje mobbing i skulen! Dersom noko skil
seg ut, trur dei er noko, tek for mykje plass, tek for lite plass,
har for dyre kle, for gamle kle, eller rett og slett kjem frå feil
slekt kan tilfeldig utvalde verta baksnakka, latterleggjorde og
utestengde for den minste bagatell. Medelevar kan få seg til å seie
og gjere dei mest fornedrande ting mot dei uskuldige stakkarane for å
heva sin eigen status i flokken. Eg berre lurer;
Kvar tek dei det frå?
Kommentarer
Legg inn en kommentar