Berre fortset-forsett
Har du ambisjonar for det nye året, Tonje?
Hmm. Ja, det har eg nok. Lat meg
tenkja. Eg trekk pusten og kjenner den friske januariveren storma
inn. Fornyings- og forbetringstrongen er like enorm som den er
obligatorisk. Alt kan endrast til det betre. Pulsen stig lett medan
eg registrerer fylgjande nyårsforsett melda seg:
-Ikkje utsetja ting. Trena meir
(sjølvsagt). Laga meir mat, helst kortreist, økologisk, frå
bunnen. Skriva meir, lesa meir, vera meir ute, tøysa meir med borna.
Kvila når eg kan. Kutta
sniksjekking av sosiale medier og fotodokumentering av eit kvart
solglimt. Trekka pusten og tenkja før eg snakkar. Sei meir
nei, mindre ja. Bidra meir. Klappa meg sjølv og andre oftare på
skuldera. Ferdigstilla prosjekta mine. Mala meir. Finna roen. Rydda
opp etter meg. Alltid, med ein gong. Laga den barneboka. Ta opp at
piano- og gitarspelinga. Verta ein friluftsfamilie. Dyrka meir sjølv.
Gå på fleire konsertar, fleire turar, senda fleire brev, eta mykje
mindre sjokolade. Nyta livet.
No hyperventilerer eg. Hjernen er brått
invadert av ein biesverm med livsstilscoachar som hoppar og sprett i
takt med «Berre-gjer-det-Ingvar». Dette går ikkje opp.
Ambisjonsnivået må jordast. Eg trekk pusten ein gong til og klappar
meg sjølv på skuldera for å faktisk tenkje før eg snakkar. Eg er
allereie god på fleire av punkta. Og dei forsetta er uendeleg mykje
meir lystbetonte enn dei nye, streberske måla.
For ikkje å snakka om slutta-med-lista, den har høg dørstokk.
Konklusjonen som fylgjer er genial, syns eg.
Forsetta
mine skal vera å fortsetja med det eg er nøgd med. Det vert jammen
ei sjølvgod liste. Men eg trur ikkje den er så dum. Motivasjonen er
god, dette kan eg jo. Eg skal berre vera meg. Eg er ikkje
heilt på bærtur. Om eg er det, kvifor endra retning når det er
akkurat i blåbærskogen eg trivs best? Kursen vert ikkje
nødvendigvis heilt stø, men eg kjenner i alle fall att dama ved
roret. -Berre fortset å ro, du, smiler ho. Snart kjem februar.
Publisert i Hordaland Folkeblad i slutten av januar 2016
Kommentarer
Legg inn en kommentar