Maskefall
-Ta fyrst på di
eiga maske før du hjelp dei rundt deg, instruerer flymannskapet. Me
tenker oss om eit sekund før me nikkar anerkjennande. Sjølvsagt er
det måten å berga flest mogleg på i ein naudsituasjon. Utan luft
kan me berre sitja der og dåna og villa kvarandre aldri så vel. Den
som set på si eiga maske med surstoff fyrst derimot kan utrette
mykje.
Konklusjonen er i
teorien lett å overføre til det meste i dette livet. Du les det
slik du vil. Småbarnsfasen, studiegrupper, venner, slekt, kollegaer.
Av og til må ein ta tak i seg sjølv før ein kan rekka ut ei hand.
Ein kan strekke seg til armane nesten fell av, men det er vanskeleg å
løfta andre når ein står som ein sundsliten seigemann og svaiar
med samanbitte tenner. Tanken er enkel og grei syns eg, men så var
det praksisen...
For det kan vera
skikkeleg tøft å seia det som det er; Beklagar, eg driv og festar
mi eiga maske. Berre vent litt. Ofte er det lettare å hiva på seg
den andre maska i staden. Du veit, ikkje den med luft til deg sjølv,
men den Superhelt-maska. Klarar-alt-eg-, Tøffare-enn-toget-,
Det-går-fint-maska. Den greie, som berre ordnar alt og gjerne tek på
seg å fiksa heile flyet før dei andre passasjerane har vurdert å
sjå etter naudutgangen.
Det er nok supert
å vera superhelt ei stund. Og det er heilt ok å ta ein Prøysen og
«Feste maska før en knakke på» i romjula. Men resten av året? Eg
lurer på om hausten er ei fin tid for å berre lata maska falla.
Heltemaska altså, ikkje den med surstoff. Berre vera maskelaus og
rå. Kva trur du?
Kommentarer
Legg inn en kommentar