Merkedag Null
Eg tenkte å skriva om samane sin
nasjonaldag, og om deira stadige kamp for vern av natur, beiteområde
og kulturarv. I tillegg ville eg trakka litt i merkedagssalaten me
står i, der morsdag/fastelavn, blåmandag, feitetysdag og ikkje
minst valentinsdag/oskeonsdag pressar på.
Så høyrte eg at Cape Town kan bli den
fyrste storbyen i verda som går tom for vatn. Tom, faktisk. Rundt 4
millionar innbyggjarar innfører no ein flaum av sparetiltak for å
utsetja «Dag Null». Uansett årsak og tiltak kan tid og vatn renna
ut. «Dag Null» kjem kanskje i mai. I så fall vert kranane stengde
og ein må stå i lange rasjoneringskøar for å fylla ei 25 liters
kanne per dag.
Til samanlikning brukar nordmenn rundt
197 liter vatn dagleg. Fem minutt i dusjen krev ca 75 liter. -Men me
har jo mykje vatn? Ja, heldigvis! Men følg meg: I snitt krev
produksjon av ei bomulls T-skjorte 1514 liter, ei dongeribukse 6814
liter og ein kg biff 20 000 liter vatn(ca-tal). Eg trur ikkje alt eg
kjøper er laga med vatn frå vestlandet. Ikkje kan eg ta æra for
vatnet som bøttar ned her heller. For å sitera ein gjeng kloke
ungar eg kjenner: «Det er skikkeleg urettferdig!» Javisst! Me er
vel same folket, med same behov?
Apropos alt over stel eg eit poeng frå
Sametingspresidenten sin nyttårstale: «Våre område er vår arv,
vår rikdom og òg vår forpliktelse. (...) Kva ynskjer me å gje
etterkomarane våre? Kva skal dei fortelja om, når dei snakkar om
oss?»
Vel, kanskje dei kan fortelja at me
tok oss ein bolle og gjorde noko kjekt på morsdag, framfor å
hamstra plastduppedingsar og T-skjorter til skapet. At vendepunktet
kom rundt MerkeDag Null, då me vakna og merka at ressursane ikkje
var uendelege. At me lurte og spurte til me fann ut kva me måtte
gjera. Tilmed før uretten ramma oss sjølv. Diskusjonen tok me med
melis om munnen.
Publisert i HF 09.02.2018
Kommentarer
Legg inn en kommentar